الجمعة، 24 فبراير 2012

صحيان بطئ من حلم جميل


كل ما أسمع صوت مطر
بأجرى
حتى لو كنا فى عز الشتا
وأنزل تحت السحاب
أفتح إيديا وصوابعى على أخرها
وألم الأحلام اللى بتقع من السما

---------------------------------
فى درس حساب المثلثات
فى تانيه ثانوى
ضيعت كام ساعه
متضايق
عشان مش فاهم
وفى الجامعه
ضيعت كام سنه
متضايق
علشان فاهم

--------------------------------
بخاف من الأمل
لما يموت
وباخاف من الأمل
لما بيصحى أكتر

----------------------------
جسمى كله شبابيك
بأطل منها
على سكان الروح
اللى عايشين بعيد
من غير ما أبكى
أصل الدموع
معاهم

---------------------------------
دايما كنت بأشوف مأساتى كده
بعد ما العمارة أتبنت
أكتشفوا إنهم
نسيوا يرموا الأساسات

------------------------------
فى الشتا
بتتفتح نفسى
على الفرح

---------------------------
العمر بيتحسب بعدد الكوابيس
اللى بتجيلك فى السنه
وعدد الاجوان اللى بتخش فى الاهلى
بأعتبار إنك أهلاوى
وعدد الاتوبيسات اللى بتشاورلها
يا تعدى من غير ما تقف
يا تطلع زحمة


 (د: مصطفى السيد سمير)