الأربعاء، 12 فبراير، 2014

وبعدها


ودايما فى الأخر
فى أخر
فى وقت فراق 

--------------------
أنا وعمر
يسأل عليها أزيها
أهز راسى كويسة
يقوللى مالك مش تمام
يقوللى طب ما تقولها
يقولى فيك شئ منها
يقولى قلبك قلبها
يقوللى ملعون السفر

--------------------
ليه يا حبيبتى
ليه يا حبيبتى الكون حدود
الثانية مش ممكن تعود

------------------
ليه يا حبيبتى ما بينا دايما سفر
ليه شمسنا
ليه القمر
مكتوب ليهم 
يعيشوا فى الفضا
أما على تراب الوطن
هنقول قضا

----------------------
قالوا العمل
كتر العمل
بينسى موت
وأنا راح أموت
ومنسكيش

------------------
أسكت كتير
تقوللى رد
سكت ليه؟
أنهى الكلام
أقول لها هقوم أنام
سلام 
سلام

----------------- 
نفسى يوم أكتب قصيدة
تقتل الخوف اللى صابنى
من ساعات عدت عليا
من دقايق لسه جاية
لو بإيدى
أوقف الوقت اللى داير
أمحى م العقل الدواير

---------------------
لو تسمحى يا حبيبتى
ألقى فى عنيكى العنونة
عنوان نشيد
عنوان نغم
عنوانى أنا
لو تسمحى يا حبيبتى
نسمع نجاة
بحلم معاك

------------------
أمسح بإيدى ع الآهات
بنحرسوا
ونجاة تغنى
نبعد سوا
ونجاة تغنى
ونعيش سوا
ونجاة تغنى
مسمعش من كل الغنا
غير همستك
تنهيدة تمحى دمعتك
دقوا الطبول

---------------- 
إحنا فى رجب ولا فى صفر
وصوت نجاة
الجذر ويّاه أنحسر
الكون فى لحظة بيسمعك
ع الطبل دا بتدقدقى
وبتهمس
على مسمعى
أرقص معى

----------------
الكلمة عندك خط طولى ع الجبين
لواد صغير منفعل
فين الأمل؟
الكلمة عندك بإختصار
عالم حزين

---------------
بصت فى حروفى وقالت كئيب
حروف قصليدك تنسحب
على القيود
حروف قصايدك  مشنقة
بؤس وشقا
خنقتنى خنق
حروف قصايدك لو تريد
محتاجة حرق
لا بيت رقص
حتى الموسيقا والجرس
بين الحروف
جرس جنازة مرعبة
بطل غبا
وأقلع سوادك فوق حروفك وأنكتب
كتاب بشوش فى المكتبة

---------------------
شروخ كتير مترتبة
عن القضاء عن القدر
عن الطريق اللى أختلف
عن إنى لازم أعترف
بإن ربك لما بيسبب سبب
فوق الجبين راح ينكتب
وبعدها

-----------------
الكون صحيح مليان غمام
بس الصحاب
هيه الشموس
هيه اللى بتخلى الحياة
أجمل عروس
هيه اللى بتخلى الخلا
وردة وندى
هيه الصبية اللى تقولك يا ولا

--------------------
ولد أسمر قابلته مرة فى الجمعة
بيسجد والعنين دامعة
ودعواته
يلاقى فى بكرة لون أخضر
يلاقى فى الوطن غنوة
وطن أكبر
يلاقى فى الوطن نفسه
يلاقى الوطن نفسه

------------------
قالوا: ليس كل ما تكتبه جيدا أو صحيحا
قلت: لو كان كل ما أكتبه جيدا أو صحيحا
لطبعت قرأنا غدا


( هيثم دبور )